JEME RURAH
Desa yang indah serta sangat menyejukkan hati.
Pemandangannya sangat memukau bak potongan surga yang di letakkan kebumi” begitulah tulisan Sumbul pada awal paragraf tulisan yang akan dia tulis.
Tapi tiba-tiba semua menjadi buyar.
***
“Jangah agi cacak bebase base tu, kanye injik aku nga kabah cacak bebase base indonesia cete tu, empai beghape malam nian kabah ni sekulah di Bandung, balik balik sedakde jeme la kabah base i” kate bapang Sumbul melengking ngumung kisah di dalam.
“Iya pi....eh au bak” kate Sumbul nimbal kisah dikamar.
‘Memang maini lah dusun ni.
Lum tau nerime kemajuan.
Sukagh nak maju.
Padahal kite harus embawe balik tuape ye kite gulih kisah dirantauan demi kemajuan dusun kite’ kate Sumbul ngumung dalam ati.
Memang Sumbul semenjak tamat SMP die dik agi di dusun.
Die la sekulah ke iligh.
Bukan keiligh pajar bulan, atau ke iligh tanju raye.
Cuma ke iligh nian.
Ke ruguk jeme maksudnye.
Kalu sekadar ke iligh nilah pemisingan ma Sangkut di iligh dusun.
Sumbul nyambung SMA ke Bandung kebetulan pang cik an nye tentra betugas di Bandung.
Masalah tuape pangkat pangcik an nye kuranglah Sumbul tau nian.
Semenjak Sumbul balek di Bandung memang banyak ye beghubah, tuguk itam nasional la beselin nga topi cepiyu gaya rapper Iwa K, baju kemeja tangan panjang la begenti nga baju kaos ketat nga jaket betukuk tebal luk bulu setue.
Sepan maitulah, biasenye sepan dasar la beselin sepan lipis ye kecik di selang baling ngetat sampai ke bukul lali. Nak kaik lagi likuh saking ketatnye.
“Ini gaul bro... di Bandung emang kayak gini cara orang besiuk” maitulah jawabannye ame Rumbai atau Samban kancenye akrab betanye sual ngape beghubah care die bepakai.
“Ay anu kance bro, bukanye dindak, kalu dikka tebeli kami ame nak embeli baju baju luk siuk an kabah ni, ape lagi ungkus ke bandung mahal maini” kate Rumbai lugu enjawapi kate Sumbul.
“Au nian, nyelah kate Rumbai tu, galak ige bujang-bujang kite ni nga kemajuan, memang la saatnye die dusun kite bebas merdeka dari belengu kesudukan, Cuma kalu mahal ame kite nak embeli nian ke Bandung, bukanye dindak, pas kalangan Remantai tu dik bie jualannye baju luk kabah ni, ape lagi mutif kulit setue luk ini” uji kate Samban nambahi sambil agak bekelas dikit kate-katenye.
Pacak menagh lah endie samban ni ngutip kate-kate dibuku. Apelagi ame pidato Soekarno pacak die nuruknye mirip.
“Kamu wa due dikde nak suntuk, gilah awal-awal ni kamu wa due jadi pelopor kudai, kite adekah repurmasi pesien (fashion) di marge kite semende ni, kite musnahkah sedakde bentuk kesudukan ye membelenggu setiap gerak jeme kite, dan titu harus kite mulai dari ripurmasi pesien(fashion)
”semangat berapi api nian Sumbul pidato depan kancenye.
Rumbai nga Samban ngangguk ngangguk saje.
Entah setuju entah dikde ngangguk nganguk saje luk pak belalang.
Jadilah petang itu Rumbai nga Samban la becelane ketat pule, pinjaman kisah di Sumbul, la bebaju ketat pule betulisan ‘gue gitu loh’ betupi cepiyu betulisan ‘NY’ bebenting palak besak, kurang dikitlah di pinggan ajang besaknye.
Bentuknye bukan sembarangan, tengkurak.
“Sadiiis cooooooooooy” ujuknye li Sumbul jeme wadue tu sate la ude besiuk, sambil ngacungkah jempul.
Sate ude petang itulah, Rumbai nga Samban la bermetamorfosis enjadi bujang gaul luk bujang bandung. Rumbai nga Samban patuh nga taat nian atas segale petuah dan petunjuk Sumbul.
Karne bagi jeme wa due tu Sumbul adalah pelupur atau seorang revolusionir di bidang pesien(fashion) di dusun nye ye masih suduk ni.
Rumbai nga Samban kance Sumbul setiduk semakan.
Malah bukan setiduk semakan agi, seidup semati, misal salah satu dari jeme tige tu ade ye nak di cangkok jantung atau ginjal mangke jeme guk itu sanggup saling bekurban demi sahabat sejatinye.
Memang okelah care jeme tige ni bekance.
Lum ka teladin li persahabatan bujang maini aghi, sengkiap sebanding nga persahabatan nabi Muhammad SAW nga Umar nga Utsman tulah.
Dulu ame embeli pilus sebungkus, harus di bagi adil rate tige, sedakdenye dibagi adil rate tige. Kecuali suarian.
Sumbul balik dusun ni kemungkinan ka sebulan, karne die empai udim ulangan umum.
Ka penaik an kekelas tige.
Jadi ka agak lame juge die di dusun.
Sempatlah die keliling-keliling kudai nga kance-kancenye busik kemane-mane.
“Pagi kite acara putoh bat” kate sumbul nga kancenye akrab tu.
“Kemane kire-kire kabah sir Mbul?” kate Rumbai nga Sumbul.
“Kite ke cughup Martenang, udim itu kite beputuh putuh ditebat Martenang, sekalian enggaghi suarianku disane” kate Sumbul ngenjuk kah skedul perjalanan pagi.
“Ok bro”kate Rumbai nga Samban seghempak ngumung.
Paginye.
Sumbul la besiuk luk bujang Bandung. Sepan ketat, baju ketat, kemungkinan isi pisaknye pule ngetat, sualnye endungnye lum balik di kebun.
Di ghumah gi kakangnye ye bujang besak nga bapangnye saje.
Bapang Sumbul ni gawinye Ngutasi pisau nga embuat kinjagh.
Jadi pecaknye memang wajar ame saghi tu Sumbul kinak an segale ngetat.
Kisah di peranginan ghumah ma Sumbul, Sumbul pacak nginak i kancenye wa due tu bejalan ngikak ngikak. Ka kebadah sumbul.
“Ay bat aku dapat ujian berat” kate Rumbai endulu becerite “banyak nian cobaan nye kandik sesuatu yang baru ni”
“Au makmane nian cubaanye mbai?” Sumbul mungguhkah cerite Rumbai.
“Enduk la marah-marah nga aku, Pas encaghuk aik pagian tadi aku la tegerabuk ditangge, sepan ye pinjaman kabah ni bat aku masih agak lum sepakaian, jadi agak likuh aku bejalan ditangge, tegerabuk untung dik umban di gaghang” rumbai ngisahkah kejadiannye pagian tadi.
Neghagh cerite Rumbai maitu, Samban ye dang minum kupi laju nyemburkah aik ke pucuk mijah lasung tebelkik belkik tetawe.
Empuk Sumbul maitulah lasung melumpat di kersi, tepulik ngerakkak di dasae.
“Ay kamu guk ini kanye ka embilah kance, malah nyemunkah, makmane jeme lain ame kamu guk ini saje nyemunkah” agak merajuk Rumbai ngumung nga kancenye due tu.
“Jangah Marah Mbai, memang maitulah cobaan demi suatu perubahan yang besak” Sumbul mulai berfilosofi ngambik kate-kate kisah di buku.
Lain pule Rumbai pasti lain pule cerite Samban.
“Ame aku dikkah melunde, cobaanku lebih besak dari Rumbai tu, pas kemaghi ngaji nga wak Khulwani aku besepan ketat pinjaman kabah tu Mbul, sembayang maghrib disane” Samban becerite sambil sekali sekali ngighup kupi nga makan beghengas di pucuk pinggan “Cuma pas dang rukuk, sembayang maghrib kemaghi tu ribut, murid-murid betine ye bebaris di belakang kemerik kik an gale, laju marah wak Khulwani nga murid-murid betine tu.
Sate la dipantawi gale ditanye i sughang sughang, ye paling besak mulut nyelalah Sintal anak wak Samsun tu, laju nyalahkah aku gale betine-betine tu, katenye ‘makmane kami dik tetawe guru ngaji, pas ka rukuk kami nginak i celane Sambanni luk teluluw laju kinak an celane dalamnye ye hello kitti tu’luk itulah menagh kate Sintal tu Mbul, maluan nian aku, gara-gara itu laju aku kene pecut 10 kali makai uwi” maitulah Samban enceritekah penderitaannye dalam menyungsung perubahan baru.
Rumbai lasung nyemburkah kupi ke arah Samban.
Sumbul maitulah pule.
Tenangis nangis tetawe.
“Ah same sajelah kamu guk ini, ribang nginak kance sare” kate Samban sambil milu ngrakkak pule.
***
Semenjak baliknye Sumbul ke dusun, bujang-bujang banyak la bejalan ngikak ngikak.
Lakatah pule ye kene pecut li Wak Aji Khulwani.
Makmane dik kene pecut ame ngaji besepan lipis ngetat (pesuk arah dengkulnye pule).
Gara gara itu pulelah keluagh peraturan Wak Aji setiap ngaji dilarang makai celane bentuk apepun, harus be kain.
“Gara-gara Sumbul pule lah laju bujang-bujang la banyak ngumung ye kecul-kecul” kate Hasnan bapang Samban ngumung nga Mang Jaelani di tuloh Aji Idris .
“Makmane dik kecul...” die beghadu becerite nak ngighup kupinye kudae.
“Contohnye petang kemaghi. Wak Sanji tu kan datuk masjid la tue umuran 60 an, madak i Samban meghistenye ‘hei pak tua mau kemana lu?’ bukanye timbalinye li Wak Sanji malah palak Samban sengkiap ngecutat kiwatinye li tongkat uwi” geleng-geleng bapang Samban ngumungkah anaknye.
“Au empuk Rambai la maitulah, la ngengutak pule nak belikah sepan lipis ye ngetat tu, tepakse di belikah sepan lipis biase, uy la mahal-mahal embelinye, malah kecikkanye agi sembak sepan dakcik, lajulah bejalan ngikak ngikak pule maini” Hasnan pule becerite tentang Rambai anaknye.
***
La liwat seminggu Sumbul lum kinah pegi kebandung, tau-tau die la beghubah.
Maini Sumbul la ngulang bebaju koko nga betuguk agi, sepan lipis la ngalih sepan dasar atau kekadang kain.
“Itulah die dengah ni jangan embesakkah lagak, gawi begaya-gaya saje di Bandung, dengah ni la ninggalkah utang di tokoh baju sengkiap setengah juta, la sampai surat kisah di Bandung di ma kepala desa tadi” endung Sumbul marah-marah di dalam.
”dengah ni kate pangcik an dalam surat ni, la dik naik kelas pule, udelah nak ngulang ngulang agi ke Bandung ngajilah nga Wak Khulwani tulah dengah. Aku dikde nak nginak agi segale sepan nga baju dengah ye luk setue tu, dengahni la salah peghasean, mancan dengah artis dengah ni, uy Mbul nak nyadar awak badah di dusun makan ijat kacang, jauh-jauh ke Bandung tu bukan nek ninggalkah utang, bukan pule aku ngajung dengah jauh-jauh ke Bandung mangke dik naik sekulah” tambah angat endung Sumbul marahi anaknye.
“Nengagh dengah ni?!”
“Au Ma ... eh Endung” Sumbul nimbal sambil belaghi tughun kebawah enjinjat gerijen nek encaghuk aik.
Inilah cerite lucu kite Semende, semuge tehibur...
selamat siang sedakdenye di mane pun berade.
NB : ilustrasi fhoto asli diambik njak salah satunye profil Admin, dari 15 Admin.
Komentar
Posting Komentar