~SURAT SEMUN KANDIK SUNTI~

Semun la pacak nian kalu sebenare Sunti tu dik tau embace.

cuma entah ngapelah die masih nuliskah surat kandik die Nga sebenare nian, Semun ni dik tau pule embace.

Cuma bujang gadis maini care besuariannye saling kighimi surat, makenye Semun memiluan besurat surat pule.

Nah cerite ini sebenare bukan betujuan ngajung kite ni belajagh embace atau pintar nulis urup sambung, Bukan itu pasalnye.

Ye enjadi cerite ni, siape ye nuliskah Semun surat nga sape ye embacekah Sunti surat.

Semun bekance akrab nga Sanusi, bujang alap tamat sekulah di Lahat. Sanusi nilah ye nuliskah Semun surat kandik suarian pujaan hatinye.

Cuma sanusi ni calak, die dindak diajung ajung saje.

“Ame kabah nak tuliskah surat, kabah tulungi aku besiang”kate Sanusi nga Semun.

Semun ni bujang besak, begadal pule, kecik ige ame gi besiang nilah.

“Mudahlah itu bat, jangahkah besiang, nebangi kawe kabah sebidang nik puntung lagi enjadi”kate Semun saking semangatnye.

“Uy kabah, ame ditebangi, kanye nak nulungi kabah tu , nak munuh aku”kate Sanusi sambil ngudak kupi, udim kudaknye tepikkanye di pinggir bighan dangau.

“Hehehehe....beragam bat jangan marah tu” kate semun sambil endulu ngighup kupi.

“Äh kabah ni, lum tebelum lah ngighup kupiku, embuat diwik sane, aik angat giade” Sanusi cacak marak sambil eng gakgak tetawe.

Memang jeme wadue ni bekance akrab nian kisah di dulu. Cuma sayangnye Semun matik bapang, jadi lum sempat nyambung sekulah.

Dimane badah Semun disitu badah Sanusi. Ame Semun pencemis, sanusi tusernye. Ame Semun ngaghah diaik besak, pastilah bedue nga Sanusi. Pukunye akrab nian.

Malam tu udim maghrib. Jeme bedue tu makan gulai bawak gulai. Guringan pirang, sambal kembuhung pule. Sate la ude bepenyap pas udim makan. Semun la begulutan embuatkah Sanusi kupi. Nyetelkah radio, pas tuju stasiun dangdutnye, pas pule dang mutar lagu Elvi sukaisih.

Sanusi laterti tuape kendak Semun sangkan lum diajung laju la embuatkah kupi, nga marakkah radio.

Dik belain nak buatkah surat kandik sunti tadi. Pinah nga buku la siapkanye pule li semun, ame amplop la sengaje nian die embeli pengaji se pak pas kalangan kemaghi.

Sambil napas tulin luk wak Ujang dukun ka ngubati jeme tesimpang, Sanusi mulai nulis kate perkate. 

Anye sate la ude sekalimat, bacekanye li sanusi nga Semun tadi. Mangke semun pacak tuape isi surat tu. Singgenye, injik dik berenti tetawe Semun nenghanye.

“Ataghan Rawis 07 November 1990

Assalamualaikum.

Sunti, aku dik kah banyak ige becerite, dik kah banyak ige bekate-kate. Karne aku memang dik tau agi bekate nga becerite. Aku la luk bidapan lidah, likuh ngumung, likuh makan. Sedakde penyebabnye tu dik lain dik bukan karne aku jauh nga dengah. 

"Sunti, dengah pernah nginak cughup tanjung tige kan? Ame lum dik ngape, aku tu betanye saje. Atau pernah tekinak nga cughup martenang?. Ame lum pule gilah dik ngape. Aku dik marah gi betanye saje.

Cughup behgembun dengah pernah tekinak? Ame lum kinah. Aku dik marah, Cuma aku dik de ka nanye nanye agi masalah cughup. Aku dik nian marah, karne ama laude nulungi Sanusi ni besiang, Insyaallah dengah ka kuajak i nyubuk cuhup cughup ye kusebutkah tadi. Dikkah kuceritekah mak mane arungnye, mangke dengah penasaran.

"Sunti, ame dengah ghindu nga aku, dikde nak cungak i langit. Cukuplah doakah aku mangke mukul agung taun ini. Doakah aku mangke kaweku lebat. Jadi aku pacak embeli kebau nek ngawini dengah.

"Sunti. Aghini la malam, kuraseku kalu dikmak ame panjang ige. Jadi sementare ini suratku jadilah kudai semak inilah. 

"Salam rindu dik udim udim dari bujang impianmu".

Waalaikumsalam...

Suarian mu seorang...

Semun Surjana”

Semun Injik, Sanusi la ude nuliskah suratnye. Rencane Semun, Kalangan Tunggul pagi die ka nitipkah surat ni nga Uwak Lipur.

Wak Lipur ka balek kedusun ka enggaghi huma entue merajenye baguk. Jadi surat tu pacak lasung sampai ketangan Sunti.

Pajar Bulan dang ujan deghas, dingin palangan petang itu. Cuma peghasesan dingin tu dik teghase bagi Sunti.

Makmane nak teghase, surat ye maini kecakkanye, die dik tau embacenye. Lum ka merupuk i dinginnye dusun Pajar bulan. Sunti dang angat dedingin merupuk i kamakmane die embace surat kisah di semun ni.

Rupuk atinye, makmane nian ceritenye laju Semun pacak nulis surat ni. Setau Sunti, Semun dik tau embace apelagi nulis.

Singgenye kutir Sunti kulu kiligh petang itu, bepayung itam sijat. Enggaghi Kumala, Rusnai, Surnai, Hasnah, Rumyana la sengkiap nak maghrib lum kinah tetemu nga kance ye pacak embacenye.

Maini tinggal harapan terakhirnye, bidan Halimah.

Bidan halimah ni la lame betugas di Pajar bulan ni, la sekitar 3 tahun.

Bidan ni asli jeme pelimbang, ulasnye alap, besak tinggi, bukan tinggi tejuluw luk junjung, Cuma tinggi alap. Bejilbab, putih kuning, ramah, nga pintar palangan, pacak pule ngaji. Ye paling penting bidan Halimah ni dik pengeghit.

“Tuk tuk tuk” Sunti enggugur duaghe perumahan bidan. Agak lame embukaknye. 

“Nah Sunti”kate bidan enjengal kah dai di depan duaghe “makmane tuape cerite Sun? Masuk masuk masuk”bidan lasung ngajung Sunti masuk. Udim itu bidan lasung kedapuw, niat nak embuatkah Sunti kupi.

Lum nepikkah pingging di kersi, Sunti lasung saje gupuh gupuh nutul bidan ke dapuw.

“Anu bidan, dikde nak riput riput, aku ni dik lame, kalu turutinye li enduk ame lum balik senampur agi” Sunti lasung ngumungkah tujuannye ke badah bidan “aku nak mintak tulung nian nga kamu bidan bace dikit surat ni” Sunti nyudurkah surat Semun nga bidan.

Nginak ulas Sunti luk ngependuk nian tu, bidan laju urung embuatkah Sunti kupi. Bidan lasung ngajak Sunti kedalam badah ruang tamu.

“Nah maitu uji, mane suratnye?”bidan nakukkah tangan mintak surat ye nak bace.

Singkatnye, petang tu Sunti lelinyum sughang sambil bejalan balik keghumah.

Pas sampai ghumah aghi la maghrib. Segale peneghaghan dijalan bagi Sunti la merdu gale, suaghe bekatak mirip lagu dangdut, teke suaghe Wak Sudin dang ngebang teghase merdu luk suaghe jeme dang musabaqoh, padahal jeme pacak gale kalu suaghe datuk masjid kami tu neraktak luk buluh bajal mubil.

Sengkiap dik tau tiduk Sunti, bukan karne die telalu ghindu nga Semun.

Cuma payah berupuk sape lah kire kire kah nulungi die embuat balasan surat ni.

Sunti tau nian peghasean Semun, maklum besuarian ni lalame, sengkiap nak empat tahun. Jadi alakah keciwenye Semun ame suratnye ye pertame dik dibalas. Pikir pikir die, mintak mintaklah bidan tadi galak ngulang nulungi die. Sate la yakin maitu. Bedelap mate Sunti ngeghuh bemimpi.

Sate la anggapnye segale gawian la udim, nanak, ngelap ghumah, embasuh pinggan, encaghuk aik, laude gale. Sunti ende ngum lasung ke badah bidan.

Memang dik tau kite nebaknye, ame dang jatuh cinta segale gawi dik nurmal agi. Sakit gigi ngalih senyum, bisulan lasung kempis. Maitulah kire kire ame jeme dang jatuh cinta. 

Kuraseku, kamu kamu ye embace kisah ini penulis tebak pasti pernah pule jatuh cinta.

Bidan lum beghusap, gumbaknye masih sugak sagai. Mancannye ibung Rusdah ye mantau die pagian ni, karne memang ibung Rusdah dang tunak sembilan bulan, jadi mancannye tadi kalu la nak melahirkah kapuh. 

Sate bukaknye duaghe, Sunti latesentul depan duaghe. Pikir atinye tuapelah agi kendak sunti ni.

“Nak ngape agi Sunti, dikbide ubat ghindu disini, ame nak melahirkah jadi mantau aku” bidan ngumung sambil nguap nguap. https://

Sunti tetawe tawe lelinyum saje nengagh bidan beragam luk itu.

Lum diajung masuk Sunti la duduk menghenak dikursi ruang tamu.

“pukunye dan, ngulang minta tulung sekali agi”sunti singkat padat jelas tu de puin.

Bidan geleng geleng tetawe.

Lasung kekamar ngambik pinah nga buku. Mulailah die nuliskah tuape ye diktikanye li Sunti

“Dusun Pajar Bulan 10 November 1990

Assalamualaikum

Dik bedie ghukam Sali jadilah

Buah manau kandik tambahnye

Dik betemu dai Salam jadilah

Ghindu bejulat nek pengiringnye

Semun, enjawapi surat dengah ye kemaghi tu. Aku tau dengah dik la dik tau becerite nga bekate kate. Bukanye maini saje kisah di dulu dulu aku latau dengah dik tau becerite nga bekate kate. Waktu mairat di qurra’ pas dengah di ajung belajagh ceramah dengah milihlah pingsan daripada bekate kate. Jadi aku la ngerti sengerti ngerti nye kalu dengah dik tau bekate.

Semun, enjawapi pertanyaan dengah tentang cughup tu, aku nunggu janji dengah, jangah luk aghi raye taun kemaghi awak bejanji ka ngajak i putuh anye dek pernah lasung teke luse. Aku dik perlu agi janji janji manis aku nak bukti. Dengah ni lame lame luk pemain pilam di tipi ‘manis dimulut lain dihati’.

Semun, maini pagian, aku dikmak ame surat ni panjang panjang menagh. Bidan badahku numpang nulis ni nak nulungi jeme melahirkah, jadi lain kali ame bidan dik sibuk aku ka mintak tulung nulis pepanjang juge".

Waalaikum salam...

Suarian dengah tulah, Siti Sunti Qomariah”

Udim surat tulisnye libidan. 

Sate sunti la balek, bidan teduduk duduk di dapuw nawekah isi surat tadi. Sengkiap dik tau agi betegak saking kelucuannye bidan pagi tu.

Sunti gupuh gapah ketukoh ibung Sundi, embeli amplop muda mudi. Surat nek Semun la balutnye cete. Dik lupe taburinye pule bedak, mangke kesannye rumantis ghum.

Menurut inmpormasi kisah di wak Lipur belas saghi, wak Lipur ka ngulang kekebun guk luse. Ame Sunti nak bekighim gacang juge, mang Sanjak ka kebun saghini. 

Singkatnye surat tu dikighimkah nga mang Sanjak, kebetulan kebun mang Sanjak nga kebun Semun gi bekelang due bidang. Belayarlah surat kisah di Sunti tu kandik Semun.

Sanusi kadang tebelkik tetawe, die embace surat kisah di Sunti kandik Semun.

Sate la embace ujungnye, sanusi empai pacak kalu ye nulis surat ni bukan sunti. Anye bidan.

Malam tu Semun betandang ke dangaunye agi. kisah di embasuh pinggan sampai nanak nga ngidangkah nasi, la Semun gale ye enggawikanye.

Sanusi la tau nian tuape kendak Semun sangkan die lincah nga beghejut nian tu. Nak ulang tuliskah surat.

Mulailah sanusi naghahkah penanye ke pucuk kertas putih.

“Ataghan Rawis. 13 November 1990

Assalamualaikum,

Sunti, Suarianku, aku la nerime surat dengah, la kubace. Mudah-mudahan aku gacang udim besiang. Aku kah balik. Kite lasung acara poto poto ke cughup.

Sunti saranku, makmane ame kite ngulang belajagh embace?. Pasanku tekinak gale resie ame surat buatkanye li sanusi nga bidan ni.

Sunti, ame didusun la ngetam kele, kite same-same tarahah kesawah pang tue an ku di tanju agung, sekalian kite mintak manis kabung. Mungkin ini saje kudai surat sandi ku

Salam rindu selalu."

Wassalamualaikum...

Semun Surjana”

Surat Semun kandik sunti la dibalut dalam amplop, Cuma semun agak betanye tanye, ngapelah suratnye ngalih due lembagh ni. Semun dik tau nian nak ngoreksinye. Embacenye die dik tau. Luk biase tulah surat dititipkah nga jeme ye ka balik kedusun.

Singkat kate, kejadian surat menyurat ni laju tejadi bebulan-bulan, singgenye la penuh rak li surat.

Rak badah surat tu tegantung di dinding dangau. Cuma ade ye Sunti selalu betanye-tanye tiap nerime atau ngighim surat selalu betambah kertas due lembagh. Maitulah saje tiap besurat.

Saghitu Semun didalam kamar penganten, bepakaian rapi. Didalam kamar ade Sanusi, Ramli, Dadap nga Rampang. Dikbedie suaghe terbangan.

Sate la agak lame juge proses ini itu. 

Di pantaulah wali dari jeme tue betine. Dipantau pule penganten lanang, penganten betine masih didalam kamar. 

Sate la beadapan penganten lanang diajung li ketip salaman nga penganten lanang. Saksinye waktu itu Semun dik kenal sape nga sape.

“Ya Sanusi Derajat engkau aku nikahkan dengan anakku Halimah Nuraini binti Sanjaya Mesra dengan mas kawin 1 suku emas dibayar tunaaiiiiiiiiiiiiiiiiiiiiiiiiii...........wali penganten betine beucap akad, langsung disambar li Sanusi dik be kelang agi... aku terime nikahnye dengan maskawinnye yang tersebut. Saksi kidaw kanan saling ngangguk, sah. 

Ketip Pelimbang langsung bedoa. 

Resmilah Sanusi bebini Halimah si Ibu bidan. 😂😂😂

(tebudi Semun Gak Sunti) 😁😁😁

TAMAT.

ASSALAMUALAIKUM.... 

SEDAKDE JEME SEMENDE DI MANE PUN BERADE, SELAMAT MENYAMBUT MALAM MINGGU.

salam SAJE !