Sendu

Bedesir begaw aku, tekinak dengah balek kalangan. Bejinjatan, embimbing anak sughang. Ase lalame dek betemu, nganan dulu-dulu nian. Kireku memudahan dengan la tenang idup umbang.

Kenangan ku laju telecit jauh ke waktu dulu-dulu nian. Balek sekulah seghempak  keujanan beghadu seramian di bawah tengkiang. Sambil lelinyum malu-maluan tepakse kite bepayung daun pisang, guguy sampai ke dusun. Ye paling ngajung dai ngabang, waktu suratku temunnye li guru kelas, tepakse aku diajung embace surat depan kance sesekolahan seramian antakkah senam.

Udem ebtanas dengah nanye nga aku ka nyambung ke mane, kukatekah aku ka nyambung ke Baturaje masuk STM, entah makmane laju dengah nutul sekulah MAN pule ke Baturaje.

Udem STM aku merantau ke Bekasi sambil kuliah. Dengah balek dusun ka honor di Madrasah dusun Bughuk, sambil kuliah terbuka berusah ke Marinim.

Surat masih lancar, kadang setelponan ame dengah dang di Marinim. Nguntap nahankah maluan aku nunggu telpon dengag di ma pak RT, dengah pun maitu nyengaje nian ke wartel. 

Pas balek agi raye, aku ase jauh ghase pas dengah ngatur kalu dengah la di rasankah nga si anu, kebetulan masih kakang kelas kite, sedusun pule. Dengah titik aik mate, ngajak aku kawin minggat. Singkat benagh, dengah dek ribang nga si anu, dengah masih ngaghapkah aku.

Kumaklumi kalu pejadi dengah beniat iluk luk itu. Umur dengah waktu itu la masuk mase dewasa ame di dusun. Bukan mamang pejadi dengah dek tau nga aku, cuma mungkin agak kurang yakin nga aku. Badahku jauh, balek jarang, dan terus terang aku lum pule nian siap. Aku lum beghani merupuk i pelaminan ame kuliah lum udem, nga la begawi. Aku sendu nginak enduk sughang kadang upahan encecagh nek nguliahkah aku.

Dengan berat sambil tegedung aik mate, aku nolak kawin minggat. Waktu tu doaku tulus benagh, mintak-mintak dengah lancar segale hajat nga sambil ku yakinkah bahwasanye pilihan pejadi dengah tu jeme iluk.

Dek teghase la 12 taun liwat kejadian itu. Ase ngulang tebukak kandul kenangan mase lalu.

Dek lame dengah la naek mutur, kukinak si anu la enjemput di ujung los. 

"Bak, aku nak embeli mubilan" anakku naghik tanganku, ngajung aku agak tekelenjagh embuyarkah rupuk an. Sekilas kukinak dengah nulih nga aku, senyum sendu. Kukire anak dengah dek jauh umurannye nga anak bujangku.

Dusun Bughuk 1998

Terinspirasi dari dari lagu "Terhenti Lamunan" dari band Uk's (Malaysia)